Kusari-Lila: Ndërhyrja e Thaçit nuk ndihmon në arritjen e koalicionit LVV-LDK

Kusari-Lila: Ndërhyrja e Thaçit nuk ndihmon në arritjen e koalicionit LVV-LDK

Deputetja nga Lëvizja Vetëvendosje, Mimoza Kusari-Lila, ka thënë se ndërhyrja e Presidentit Hashim Thaçi nuk e ndihmon arritjes së marrëveshjes midis Lëvizjes Vetëvendosje dhe Lidhjes Demokratike të Kosovës për ta formuar Qeverinë e re.

Në një intervistë në Info Magazine në Klan Kosova, ajo ka thënë se në Kosovë ka pasur situata të ngjashme ku subjektet politike janë vonuar ta formojnë Qeverinë dhe roli i Thaçit nuk ka qenë kaq aktiv.

“Për këtë rast presidenti Hashim Thaçi ende nuk e ka marrë emrin e mandatarit nga Lëvizja Vetëvendosje. Përderisa nuk ka predispozitë të qartë që e tregon hapësirën kohore për emrin e mandatarit; atëherë mendoj që edhe Presidenti duhet të ketë vetë-frenim nga gara politike apo kundërshtia politike”.

“Dihet se flasim për dy oponentë politikë [Kurti-Thaçi] në vazhdimësi. Tash ndërhyrjen e çfarëdo natyre të Thaçit në këtë proces shumë të ndjeshëm që nuk i bënë mirë arritjes së një marrëveshje, nuk po e shoh si pozitive”.

“Në momentin e parë kur ka sinjale se do të ketë votim të koalicionit qeverisës në Kuvend, atij [Thaçit] zyrtarisht do t’i dërgohet emri i mandatarit të Qeverisë”.

“Jam shumë e sigurt se do të pritet momenti kur ku do të ketë mundësi të mirëfillta të votohet kabineti qeverisës në Kuvend. Kemi pasur situata të ngjashme të vonesave gjatë vitit 2017 dhe nuk e kemi pasur një rol kaq aktiv të Thaçit (asokohe kur partia e parë ka qenë edhe ish-partia e tij)”.

“Sa është afër koalicioni nuk kam informata të qarta sikurse edhe ju. Ndërsa a është i mundur? Unë mendoj se është i domosdoshëm – kjo për faktin se gjithë ajo shpresë dhe entuziazëm i 6 tetorit tregoi se qytetarët ishin shumë të qartë në përcaktimin e tyre për ndryshim”.

“Nëse klasa politike dështon ta përcjellë kërkesën dhe mandatin që e ka marrë drejtpërdrejt prej popullit me votën e qytetarëve; atëherë me siguri se do të ketë probleme shumë serioze me funksionimin e demokracisë në Kosovë në muajt në vijim”.

Kusari-Lila: Ndërtimet rreth Liqenit të Badovcit të ndalen menjëherë

Kusari-Lila: Ndërtimet rreth Liqenit të Badovcit të ndalen menjëherë

Deputetja e grupit parlamentar të Lëvizjes Vetëvendosje, Mimoza Kusari-Lila ka reaguar pas ndërtimeve që po bëhen rreth Liqenit të Badovcit, duke thënë se abuzimet në Kosovë me lumenjë kanë eskaluar në format më banale të mundshme, ndërsa rreth liqeneve kanë filluar me liqenin e Radoniqit, e tash po synohet të vazhdohet me Badovcin.

Kusari-Lila, përmes një postimi në facebook, ka thënë se në një shtet ku sundon ligji hapësirat e uzurpuara rreth liqenit lirohen.

Postimi i deputetes Kusari-Lila:

“Në një shtet ku sundon ligji hapësirat e uzurpuara rreth liqenit lirohen. Abuzimet në Kosovë me lumenjë kanë eskaluar në format më banale të mundshme, ndërsa rreth liqeneve kanë filluar me liqenin e Radoniqit e tash po synohet të vazhdohet me Badovcin.

Duke shpresuar se njëherë do të jemi edhe ne shtet normal dhe duke mos dashur të shohim demolime të tilla, ndërtimet duhet të ndalen MENJËHERË!”, ka shkruar ajo në Facebook./

 

Kusari-Lila për kandidimin e Vjosa Osmanit: Paralajmërim i një etape të re të Kosovës

Kusari-Lila për kandidimin e Vjosa Osmanit: Paralajmërim i një etape të re të Kosovës

Ish-deputetja dhe themeluesja e Alternativës, Mimoza Kusari-Lila ka mirëpritur kandidimin e Vjosa Osmanit për kryeministre.

Kusari-Lila përmes një postimi në Facebook, ka shkruar se “kandidimi i Vjosës ka shumë simbolika, por më e rëndësishmja është ajo e paralajmërimit të një etape të re të Kosovës, asaj të vlerave, barazisë dhe drejtësisë; etapës së shumë pritur nga shumica e qytetarëve të Kosovës”.

Postimi i plotë:

Lufta për barazi gjithmonë është lufta për mundësi të barabartë. Është luftë dhe përpjekje për t’u mos mohuar e drejta gruas dhe vajzës për shkak të gjinisë së saj.

Kjo betejë për barazi dhe mundësi të barabartë u fitua dje në Lidhjen Demokratike të Kosovës me kandidimin e Vjosa Osmanit për Kryeministre nga kjo parti.
Dhe ashtu siç e kërkuam gjithmonë, fitorja ishte e përbashkët, e burrave dhe grave. E Vjosës në emër të gjysmës së popullatës që përfaqëson, por edhe e Kryetarit Mustafa dhe Lutfi Hazirit që dolën krah saj. LDK e bëri ashtu si duhet të bëhët, bashkë dhe me një zë.

Kandidimi i Vjosës ka shumë simbolika, por më e rëndësishmja është ajo e paralajmërimit të një etape të re të Kosovës, asaj të vlerave, barazisë dhe drejtësisë; etapës së shumë pritur nga shumica e qytetarëve të Kosovës.

Dje dhe mbrëmë u dhanë shumë komente: a bëri Vjosa koncenzus në parti? A do të mund të jetë Kryeministre e fortë dhe e pavarur në vendimarrje?
Vjosës iu cituan edhe fjalët e thëna për Kryetarin e partisë dhe zënkat brenda LDK-së. Krejt këto valide, por jo të domosdoshme për momentin.
Momenti është i Vjosës dhe i vajzave që do të inkurajohen të shpresojnë dhe guxojnë të veprojnë, pasi do ta dijnë se një prej tyre ia doli me betejë.
Shumë kompromise bënë burrat me muskuj në politikën tonë. Beteja dhe konflikte shumë më të ashpëra patën mes vete, për t’i harruar pastaj të gjithat vetëm për të ardhë te pushteti.

Jam e bindur se as për së afërmi as nuk i bëri dhe kurrë nuk do t’i bëjë Vjosa këto kompromise në karrierë.

Andaj, relaksohuni dhe besoni se me të vërtetë një grua ia doli të marrë besimin e burrave dhe grave në partinë e saj për mundësinë e barabartë të garoj për Kryeministre në bazë të meritave të saj.

Gara do të jetë shumë më me vlerë dhe interesante me Vjosën pjesë e saj.

Ditë e bukur dhe e mbarë ishte dje për Kosovën dhe barazinë në Kosovë. /Telegrafi/

Kryetarja e Alternativës dhe deputetja Mimoza Kusari tregon me kë pritet të bëjnë koalicion dhe për kënd kanë vija të kuqe

Kryetarja e Alternativës dhe deputetja Mimoza Kusari tregon me kë pritet të bëjnë koalicion dhe për kënd kanë vija të kuqe

Qëndrimet pro ekipit negociator kanë ndikuar që Ilir Deda, një nga themeluesit e partisë Alternativa, të distancohet po nga kjo parti, pasi që anëtarët e tjerë kishin qenë kundër, duke përfshirë edhe kryetaren Mimoza Kusari-Lila.

Kryetarja e Alternativës, Mimoza Kusari-Lila, në një intervistë për KosovaPress, ka deklaruar se kryesia e partisë nuk e ka mbështetur ligjin për dialogun dhe ekipin negociator, por që nënkryetari Ilir Deda kishte qenë pro.

Ajo thotë se vendimi i Gjykatës Kushtetuese, tregon se kush ka vepruar në mënyrë të duhur.

Kusari tha se Deda ka qenë vetëm në një mbledhje të kryesisë kur është diskutuar e ardhmja e subjektit në raport me bashkëpunimin me partitë tjera, ndërsa në mbledhjet tjera nuk ka marrë pjesë.

Ajo potencon se Alternativa është duke e vazhduar aktivitetin e saj, teksa ka folur për vështirësitë të cilat po i hasin.

Ajo ka treguar se Lidhja Demokratike e Kosovës që nga shtatori i vitit të kaluar ka ndalur fondin e demokratizimit për Alternativën, si rrjedhojë e daljes së saj dhe deputetit Ilir Deda nga grupi parlamentar i LDK-së.

Ajo ka treguar se nga kryetari i LDK-së, Isa Mustafa, i është vendosur kushti se nëse dëshirojnë fondin duhet të kthehen në grup parlamentar, e për këtë Kusari thotë se është absurde.

Alternativa në zgjedhjet e fundit ka kandiduar në një listë me LDK-në, e në rast të zgjedhjeve të reja, Kusari tregon se për kë kanë vija të kuqe.

Ajo është shprehur e bindur se nëse partitë opozitare bashkëpunojnë suksesi në zgjedhje nuk do të mungojë./KosovaPress/

Komunikata nga Konferenca për Media 06.07.2019

Komunikata nga Konferenca për Media 06.07.2019

Komunikata nga Konferenca për Media

Keqpërdorimet po thellohen, buxheti dhe shteti po rrezikohet – vendi duhet të shkojë në zgjedhje sa më parë

Alternativa konsideron se raportet e fundit të auditorit të përgjithshëm dhe keqpërdorimet e evidentuara të parasë publike bashkë me abuzimin e detyrës zyrtare, tregojnë për vazhdimësinë e përkeqësimit të qeverisjes në Kosovë.
Nëse ky trend i keqqeverisjes dhe investimeve pa plan dhe strategji nuk ndalen, vendi rrezikon hyrjen në ciklin e krizës së rëndë finaniare dhe sociale.

Shembull mund të merret raporti i Auditorit i Ministrisë së Mjedisit në të cilën janë evidentuar borxhet e pashlyera të shpronësimit prej vitit 2010 – 2018, në vlerë prej 160 milion Euro, pëderisa Qeveria po vazhdon me vendimet e saja të thellojë krizën dhe borxhin e shpronësimeve me projektet e reja të cilat nuk kanë as fizibilitet dhe as vlerësim të ndikimit në mjedis.

Shpenzimet në investime kanë degraduar, përderisa nuk arrihet të investohet mjetet nga huamarrja si rrjedhojë e problemeve dhe paaftësisë së menaxhimit të tyre. Shembull është huamarrja nga fondi arab për rrugët rajonale me vlerë 8 milion euro të cilat nuk po realizohen.
Qeveria humb projekte nga fondet e BE-së siq është rasti me 12 milion Euro të deponisë së mbeturinave të rrezikshme si rrjedhojë e paaftësisë së saj për të evidentuar një lokacion për të cilin do të bëhej vlerësimi i ndikimit në mjedis dhe pastaj investimi. Askush nuk merr përgjegjësinë për fondet e humbura.

Përderisa, ditë më parë u nënshkrua memorandumi nga Kryeministri dhe Kryetari i Prishtinës, për ndërtimin e kompleksit qeveritar, Prishtina e re, e cila do të përfshijë 700,000 m2 hapësira të reja administrative qeveritare, ndërsa sot në menaxhim janë 68 ndërtesa me 216,393.76 m2 hapsira të brendshme.
Përderisa planifikohet zvogëlimi i numrit të ministrive dhe rrjedhimisht shërbyesve civil në to, synohet rritja e hapësirës administrative pa asnjë analizë dhe vlerësim profesional dhe mbi të gjitha me shpenzime shtesë, të cilat në asnjë mënyrë nuk e rrisin mirëqenien e qytetarëve të Kosovës, por vetëm ushqejnë tenderomaninë dhe thellojnë keqpërdorimin e buxhetit të shtetit.

Projekt tjetër me rrezik të lartë për buxhetin e shtetit është ai i autoudhës së Dukagjinit, për të cilin Alternativa vlerëson se në rrethanat ku kemi ikje të qindra mijëra të rinjëve dhe intelektualëve nga Kosova, kemi nivel jo të ulët të shërbimeve në arsim, shëndetësi, zhvillim ekonomik, shpenzimi i 1 milardë eurove për ndertimin e kësaj autorruge është më shumë se gabim.
Alternativa vlerëson se në këtë projekt po mbizotëron mendësia dhe lakmia e përqindjeve nga tenderi i saj dhe shpronësimet.
Me ketë shpenzim eventual të 1 milardë eurove me skemen aktuale sociale dhe me numrin e afro 85 mijë të të punësuarëve që paguhen nga buxheti i Kosovës, realisht dhe sipas të gjitha parametrave ekonomikë rrezikohet seriozisht buxheti dhe do të ndodhë Bankrotimi Financiar i Shtetit të Kosovës, sepse shumë shpejt Kosova nuk do të jetë në gjendje të paguaj obligimet, detyrimet e saja ligjore fillimisht ndaj qytetarëve të saj e pastaj edhe ndaj kreditorëve të saj ndërkombëtar.

Për Alternativen, në mes të dhjetëra çështjeve tjera serioze, qeverisja që seriozisht rrezikon bankrotimin financiar dhe funksionimin e shtetit të Kosovës është arsyeja më përmbajtësore dhe më urgjente pse kjo qeveri, ky kuvend dhe ky president duhet të largohen sa më parë nga aty ku janë dhe të shpallen zgjedhjet e e reja.

Prandaj Alternativa kërkon që:

1. Sa ma parë të caktohet data e zgjedhjeve të ardhëshme nacionale
2. Të merren me seriozitet Raportet e Auditorit nga institucionet përgjegjëse dhe të sanksionohen ata që kanë abuzuar me paranë e shtetit .
3. Alternativa thërret, partitë opozitare të dakordohen për strategjinë zgjedhore dhe përcaktojnë standardet e qeverisjes të cilat do të përfshijnë:

a. Përcaktimin e qartë të prioriteteve qeverisëse përfshirë masat e menjëhershme për ndaljen e migrimin e të rinjëve nga Kosova
b. Reformën e thellë të administratës publike
c. Planin strukturor për balancim e buxhetit të shtetit
d. Ri-shikim të projekteve kapitale dhe përcaktim të standardeve për investime, në të cilat duhet të përfshihen vlerësimet mjedisore dhe sociale
e. Përcaktimin e axhendës së integrimit dhe kthimin në binarë të zbatimit të marrëveshjes së stabilizim asociimit