Kryetarja e Alternativës znj. Mimoza Kusari-Lila, në emisionin Interaktiv në Koha Vision, ka deklaruar se mbajtja e zgjedhjeve të reja parlamentare nuk do të ishte zgjidhja optimale për situatën aktuale politike në vend. Ajo ka folur edhe për kandidaten për Kryetare të Kuvendit, znj. Albulena Haxhiu si gruaja më e votuar në zgjedhjet e fundit. “Nuk është çështja e emrit, është çështje e parimit. Është precedent i keq për të ardhmen që mund të krijojë përshtypjen se Haxhiu ishte vetëm një manipulim i Kurtit për të shtyrë partitë tjera të pranonin një kandidat tjetër’, ka thënë kryetarja Kusari-Lila. Ajo ka thënë se nuk është kundër nëse zgjedhjet mbesin si opsion i vetëm, por ato duhet të mbahen në të njëjtën ditë me zgjedhjet komunale, për të shmangur ngarkesën e tepërt ndaj qytetarëve. “Kam thënë prej fillimit se mund të mbetet mundësia e vetme, por absolutisht jo më e favorshme për qytetarët. Mbajtja e një palë zgjedhjeve nacionale, pa rezultat në formimin e institucioneve, do të reflektonin keq për të gjitha partitë”, ka thënë ajo. Duke folur për zgjedhjet lokale që tashmë është përcaktuar data, më 12 tetor 2025, ajo ka thënë se do të garojnë ndamas nga VETEVENDOSJE. “Është shumë e rëndësishme që përveç se të kemi kandidat me program, të punojmë më shumë për promovimin e frymës liberale dhe atë se çfarë përfaqësojmë ne”, është shprehur ajo.

Kryetarja e Alternativës znj. Mimoza Kusari Lila duke kujtuar 147 vjetorin e Lidhjes Shqiptare të  Prizrenit, ka thënë se 10 Qershori është dita e amanetit kombëtar. Ajo ka shtuar se, kjo datë mbart shpirtin e qëndresës dhe të lirisë shqiptare. “10 Qershori është një datë që mbart ngjarje domethënëse për shqiptarët dhe shtetin e tyre, me një emërues të përbashkët: mbrojtjen e tokës, lirisë dhe të drejtës për një shtet sovran. Në historinë e re të kombit, 10 Qershori vazhdon të shënohet si një datë me rëndësi të veçantë për lindjen dhe formimin e shtetit të Kosovës. 📍 10 Qershor 1878 – U themelua Lidhja e Prizrenit, organizimi i parë politik gjithëkombëtar për të ruajtur tokat shqiptare nga copëtimi pas disfatës së Perandorisë Osmane. Ishte zëri i parë modern i vetëdijes kombëtare. 📍 10 Qershor 1999 – NATO ndal sulmet ajrore kundër forcave serbe, duke hapur rrugë për zbatimin e Marrëveshjes së Kumanovës. Ushtria dhe policia serbe u tërhoqën nga Kosova, ndërsa u hap rruga për çlirimin dhe vendosjen e paqes. 📍 10 Qershor 2007 – Presidenti amerikan George W. Bush, gjatë vizitës në Tiranë, shpalli qartë: “Vjen momenti, më herët se sa më vonë, kur duhet thënë – mjaft më! Kosova është e pavarur!” Një deklaratë që vulosi mbështetjen për pavarësinë e vendit tone”, ka thënë kryetarja Kusari Lila. “Lidhja është gjallë sepse idealet e saj janë ende gjallë. Sot, përballë sfidave të brendshme dhe jashtme, kujtesa historike na thërret që të qëndrojmë të bashkuar, të vendosur dhe krenarë.  Kosova nuk ka kthim prapa. Ajo ecën përpara me dinjitet, guxim dhe besim në vetvete”, ka shkruar ajo. “Amaneti i Lidhjes është mbrojtja e shtetit”, ka theksuar Kusari Lila.

Me rastin e Kurban Bajramit, përfaqësues të Alternativës vizituan Këshillin e Bashkësisë Islame në Gjakovë ku u pritën nga kryetari, Dr. Valon ef. Myrta. Të prirë nga kryetari i degës, z. Agon Dobruna, sekretarja znj. Diana Qarkaxhija, si dhe anëtarë të tjerë të Alternativës, ata përcollën urimet më të përzemërta për një Bajram të begatë, duke theksuar rëndësinë e kësaj feste për forcimin e vlerave të paqes, solidaritetit dhe mirëkuptimit ndërmjet qytetarëve. Dobruna: “Urojmë që kjo festë e shenjtë të sjellë paqe, begati dhe dashuri në çdo familje. Qofshin të pranuara sakrificat dhe lutjet tuaja. Gëzuar Kurban Bajramin!” Gjatë vizitës, përpos që uruan festën, theksuan rëndësinë e solidaritetit dhe ndihmës për të varfërit.

Panairi Kombëtar i Punës dhe Karrierës, tashmë një ngjarje tradicionale që organizohet për të nëntin vit radhazi, vazhdon të shërbejë si një urë lidhëse ndërmjet punëdhënësve dhe punëkërkuesve në Kosovë. Ky panair ofron një platformë të hapur për bashkëpunim, duke krijuar mundësi konkrete punësimi, ndërtimi karriere dhe zhvillimi profesional. Organizuar në bashkëpunim nga Qeveria e Kosovës, Qeveria Gjermane përmes Agjencisë së Punësimit dhe GIZ Kosova, në partneritet me Universitetin e Prishtinës “Hasan Prishtina” dhe Odën Ekonomike Gjermano-Kosovare. Zëvendësministri i Ministrisë së Financave, Punës dhe Transfereve z. Agon Dobruna ka thënë se panairi ka mbledhur rreth 130 kompani dhe institucione pjesëmarrëse, të cilat prezantojnë oferta të ndryshme për punësim, praktika profesionale, trajnime dhe mundësi shkollimi. “Tash e nëntë vite me radhë, Panairi Kombëtar i Punës dhe Karrierës shërben si një hapësirë e cila bashkon punëdhënësit dhe punëmarrësit, duke pasur kështu mundësi dhe përfitime të ndërsjella. Nën organizimin e përbashkët të Qeverisë së Kosovës, Qeverisë Gjermane, nepermjet Agjencisë së Punësimit, G.I.Z Kosova si dhe Universitetit të Prishtinës „Hasan Prishtina“ dhe Odës Ekonomike Gjermano-Kosovare, panairi mblodhi rreth 130 kompani e institucione pjesëmarrëse që do të promovojnë oferta të ndryshme për përfshirje në karrierë, oferta pune, punë praktike, trajnime, apo shkollim. Me mbi 500 vende te lira të punës në dispozicion në sektorë të ndryshëm, panairi pritet të ofrojë mundësi reale të përfshirjes në tregun e punës”, është shprehur ai.

Kryetarja e Alternativës znj. Mimoza Kusari Lila ka reaguar karshi situatës aktuale politike në vend. Ajo ka thënë se, pavarësisht mosdakordësive dhe rivaliteteve politike, vendi nuk mund të mbetet peng i kalkulimeve partiake. Kosova ka nevojë urgjente për funksionalitet institucional. “Nga zgjedhjet e rregullta parlamentare të 9 shkurtit 2025, LVV – Guxo – Alternativa dolën me 48 deputetë, PDK me 24 deputetë, LDK me 20 deputetë, LS me 9 deputetë, AAK-Nisma me 8 deputetë, KDTP me 2 deputetë dhe SPO, NDS, VAKAT, SDU, PLE, PAI, PREBK, IRDK, JGP me nga një deputet”, ka thënë ajo. 1. Me të filluar seanca për konstituimin e kuvendit të legjislaturës së nëntë me 15 prill, deputetët e opozitës votuan kundër duke pamundësuar betimin e deputetëve. 2. Kryesuesi i seancës, deputeti më i moshuar, Avni Dehari, i shkroi letër Presidentes Osmani duke e pyetur si të ecim tutje dhe ajo menjëherë ju përgjigj: ju deputetët e zgjedhur merruni vesh e gjeni zgjidhje. 3. Deputetët opozitarë ndërruan qëndrim lidhur me verifikimin e mandateve dhe deputetët u betuan me 19 prill. Subjekti fitues i zgjedhjeve propozoi për kryetare të kuvendit Albulena Haxhiun, deputeten më të votuar që kishte marrë mbi 125 mijë vota me 9 shkurt. 4. Albulena Haxhiu mori 57 vota, pra 48 të LVV dhe 9 nga komunitetet joshumicë. Në bazë të Rregullores së Kuvendit, seanca duhej vazhduar më së largu çdo 48 orë. Meqë nuk kishte marrëveshje pas konsultimeve me përfaqësuesit e partive që organizoi kryesuesi Dehari, LVV ishte e detyruar ta përsëriste propozimin e saj. 5. Pas gjashtë votimeve të pasuksesshme për kryetare të Kuvendit, kryesuesi Avni Dehari kërkoi të provojmë votimin e fshehtë bazuar në pikat 124 dhe 125 të aktgjykimit të Gjykatës Kushtetuese nga 26 gushti i vitit 2014. Themelimin e komisionit përkatës deputetët opozitarë po e bojkotojnë tash e 16 herë! 6. LDK ka refuzuar të marrë pjesë edhe në takimin për marrëveshje për konstituim të kuvendit me 1 maj, edhe në atë për marrëveshje politike me 5 maj. Të dyja këto takime ishin thirrur nga kryetari i LVV dhe kryeministri në detyrë Albin Kurti. 7. Që nga 12 maji, çështja e votimit të fshehtë është adresuar në Gjykatën Kushtetuese nga 5 deputetë të AAK, 5 të LDK-së dhe një të PDK-së. Nesër mbushen tri javë prej se jemi në pritje të gjykimit të saj. 8. LVV e ka kryer obligimin kushtetues, e ka dhënë propozimin e vet për kryetar kuvendi pa asnjë vonesë (për dallim nga PAN-i në verën e vitit 2017). 9. LVV njëmend nuk e ndërron propozimin, por tanimë çështja është kuorumi për votimin e fshehtë dhe jo Albulena. Në kundështim me pikën 128 të aktgjykimit të GjK nga viti 2014, nesër opozita do ta pamundësojë kuorumin për herën e 17! 10. Bojkoti e bllokimi opozitar në thelb është pakënaqësi dhe mospranim i rezultatit zgjedhor. Pavarësisht mosdakordësive dhe rivaliteteve politike, vendi nuk mund të mbetet peng i kalkulimeve partiake. Kosova ka nevojë urgjente për funksionalitet institucional. Opozita duhet të reflektojë me përgjegjësi për domosdoshmërinë e konstituimit të Kuvendit, për formimin e qeverisë dhe për kthimin e plotë të kompetencave qeverisë në detyrë. Qytetarët kanë votuar dhe presin që institucionet të funksionojnë dhe të marrin vendime fuqiplotë, jo të zvarriten për shkak të inateve politike dhe mospjesëmarrjes në votime në Kuvend.

Kryetarja e Alternativës znj. Mimoza Kusari-Lila, ka reaguar pas dështimit të 19-të me radhë për konstituimin e Kuvendit të Kosovës. Ajo ka ripërsëritur se janë partitë opozitare ato që po bllokojnë procesin. “Këto votimet e fundit janë votime të cilat nuk ka pjesëmarrje të përfaqësuesve të partive opozitare për komisionin për votimin e fshehtë. Në situatën aktuale, e kemi të paqartë se cila është kërkesa e opozitës. Në rrethanën në të cilën jemi, është një situatë ku bllokuesit e vetëm janë partitë që nuk marrin pjesë në votim”, ka thënë ajo. “Në rast se duan të bëjnë Qeverinë ose të jenë pjesë e një qeverie të partive opozitare të deritashme, atë nuk mund ta kenë pa u votuar kryetari, nënkryetarët dhe pa u konstituuar Kuvendi. Nuk është që kemi hezituar të vijmë çdo 48 orë por kemi propozuar për shkak se nuk ka lëvizje të qëndrimeve të tyre” , ka shtuar Kusari-Lila.

Të shtunën kryetarja e Alternativës znj. Mimoza Kusari-Lila, mohoi akuzat për shkelje të rregullores së Kuvendit lidhur me propozimin që seancat të mbahen një herë në javë, e jo çdo 48 orë siç është paraparë. Ajo pas vazhdimit të seancës konstituive të Kuvendit të Kosovës, sqaroi se ishte një propozim i hapur për konsultim mes grupeve parlamentare dhe jo një veprim i njëanshëm. Kusari-Lila tha se propozimi nuk u pranua dhe rrjedhimisht nuk u realizua, duke shtuar se nuk ka pasur asnjë shkelje të rregullores. https://www.facebook.com/watch?v=1746309589285380

Të mërkurën në Shkup të Republikës së Maqedonisë së Veriut u mbajt Konferenca Rajonale: “Sfidat e Punësimit dhe Përfshirjes Sociale të Personave me Aftësi të Kufizuara në Ballkanin Perëndimor”. Zëvendësministri i Ministrisë së Punës, Financave dhe Transfereve z. Agon Dobruna, njoftoi pjesëmarrësit për hapat dhe progresin e arritur në këtë drejtim, përfshirë ndryshimin dhe plotësimin e rregulloreve përkatëse në shërbim të personave me aftësi të kufizuara. Dobruna prezantoi masat e ndërmarra përmes Agjencisë së Punësimit dhe vëmendja e shtuar për kategoritë e cenueshme nëpërmjet inspektimeve të kryera nga Inspektorati i Punës. Ai ka theksuar se po ndërmerren hapa të rëndësishëm në kuadër të reformës së skemës së asistencës sociale dhe fuqizimit të ndërmarrësisë sociale si koncept. “Me pjesëmarrjen e shumicës së vendeve të Ballkanit Perëndimor dhe organizatave të shoqërisë civile vendore e ndërkombëtare, patëm rastin të diskutojmë, shkëmbejmë përvojat dhe të tregojmë të arriturat, sa i përket përfshirjes sociale për personat me aftësi të kufizuar dhe sfidat që na presin përpara për të avancuar më tutje politikat dhe përkushtimin në këtë fushë. Pjesëmarrësit i njoftova për hapat dhe progresin e arritur në këtë drejtim si Ministri e Financave, Punës dhe Transfereve, duke ndryshuar dhe plotësuar regulloret përkatëse, në shërbim të personave me aftësi të kufizuar. Gjithashtu edhe masat e zhvilluara përmes Agjencisë së Punësimit dhe vëmendjen e shtuar për kategoritë e cënueshme përmes inspektimeve të IQP-së. Në të njëjtën kohë, po ndërmarrim hapa të rëndësishëm në kuadër të reformës së skemës së asistencës sociale si dhe fuqizimit të ndërmarrësisë sociale si koncept. Sigurisht se rruga drejt përfshirjes së plotë është e gjatë dhe me shumë sfida, por përfshirja e personave me aftësi të kufizuara në tregun e punës është e një rëndësie të veçantë sa i përket zhvillimit ekonomik dhe shoqëror të vendit. Andaj na takon që të angazhohemi bashkërisht që të krijojmë një shoqëri ku çdo individ, pa dallim, ka mundësi të barabarta për të kontribuar dhe për të jetuar me dinjitet”, ka theksuar zv/ministri Dobruna.

Kryetarja e Alternativës znj. Mimoza Kusari-Lila, të martën ka konfirmuar se kryeministri Albin Kurti ka pranuar ftesën e presidentes znj. Vjosa Osmani për pjesëmarrje në takimin me partitë politike, “Besoj që përgjigja është pozitive për pjesëmarrje në takim,” tha ajo. Ajo theksoi se takimi ka të bëjë me konstituimin e Kuvendit, duke shtuar se zyra e presidentes nuk duhet të përdoret për marrëveshje politike, por për të diskutuar krizën aktuale dhe mundësitë për zhbllokim institucional. “Përderisa po vazhdon kjo përpjekje çdo 48 orë për konstituimin e Kuvendit, në anën tjetër po zhvillohen disa përpjekje jashtë Kuvendit, me mandat të deputetëve, të kota dhe të pasuksesshme, për të ndërhyrë në procese të cilat shumë lehtë do të mund të kanalizoheshin dhe të merrej vendimmarrje e mirëfilltë brenda një Kuvendi të konstituuar. Siç e pamë me përpjekjen e dështuar të LDK-së për të ndikuar në tërheqjen e vendimit të ZRrE-së për energjinë. Është për keqardhje që dikush, me gjithë atë përvojë në legjislativ dhe ekzekutiv, nuk e ka të qartë vendimmarrjen e një organi të pavarur. Është për keqardhje dinamika jashtë Kuvendit, por edhe ajo brenda tij, me mospjesëmarrjen e këtyre partive opozitare në votim”, ka thënë ajo gjatë deklaratës së saj pas përpjekjes për konstituim të Kuvendit të Kosovës. https://www.facebook.com/mimozakusari/videos/1830868417769277

Kryetarja e Alternativës znj. Mimoza Kusari Lila, është deklaruar të dielën pas vazhdimit të seancës konstituive se opozita është duke bërë shkelje me mosvotim në Kuvend. Ajo tha se opozita me mbledhjen e nënshkrimeve për shfuqizimin e vendimit të ZRRE-së, është duke bërë propagandë, pasi këto veprime, sipas saj, nuk kanë asnjë efekt. “Kemi ardhur në një situatë paksa paradoksale në raport me kërkesat dhe veprimet e opozitës së deritashme, të cilat do të duhej të ishin aktivisht të angazhuar në votim. Po e shfrytëzojnë për të ngritu qështje që nuk kanë asnjë efekt, siç është rasti me çështjen e vendimmarrjes së ZRRE-së. Po bëjnë veprime, po bëjnë shkelje në Kuvend, duke mos votuar. Janë duke mbledhur nënshkrime. Ngritje të çështjeve që nuk kanë asnjë efekt real, përveç propagandë që kinse po brengosen për qytetarët”, tha Kusari-Lila.