Rrjeti i OJQ-ve të Grave “Qeliza” mirëpriti në një takim të veçantë kandidatët për deputetë nga Alternativa, pjesë e koalicionit të Lëvizjes Vetëvendosje, Skender Thaçi dhe Diana Qarkaxhija. Gjatë takimit, kandidatët theksuan angazhimin e tyre të plotë për përmirësimin e mirëqenies së grave dhe fëmijëve, duke promovuar barazinë gjinore përmes nismave arsimore dhe përpjekjeve avokuese që synojnë si institucionet ashtu edhe komunitetin më të gjerë. “Do të angazhohemi maksimalisht për të ndërtuar politika dhe iniciativa që fuqizojnë gratë dhe krijojnë një shoqëri më të drejtë dhe më gjithëpërfshirëse,” u shprehën Thaçi dhe Qarkaxhija. Ata po ashtu theksuan se zhvillimi i projekteve të përbashkëta, që integrojnë barazinë gjinore në të gjitha aspektet e shoqërisë kosovare, është emërues i përbashkët i të gjithëve që synojnë zhvillimin dhe përparimin e vendit. Në këtë takim u diskutuan edhe sfidat me të cilat përballet Rrjeti i Grave “Qeliza” në Gjakovë, duke u theksuar rëndësia e bashkëpunimit të vazhdueshëm për adresimin e tyre.
Diana Qarkaxhija viziton ekspozitën e piktorit Alban Meka
Ekspozita me titull “Parcelat” e piktorit gjakovar Alban Meka përfaqëson një vlerë të shtuar të rëndësishme në skenën artistike të Gjakovës dhe më gjerë. Në këtë ekspozitë të veçantë, e cila ka zgjuar interes dhe kurreshtje të madhe tek vizitorët, janë prezantuar 40 piktura me përmasa të ndryshme, që pasqyrojnë mjeshtërinë dhe forcën shprehëse të artistit ekspresionist. Veprat e Alban Mekës flasin pa fjalë, por me ngjyra të fuqishme dhe energji artistike, duke dëshmuar aftësinë e tij krijuese për të depërtuar thellë në shpirtin e shikuesit. Me këtë rast, kandidatja për deputete nga Alternativa, pjesë e listës së koalicionit të Lëvizjes Vetëvendosje, Diana Qarkaxhija, ka përgëzuar artistin për artin e tij ekspresionist të realizuar me një mjeshtëri të rrallë. Ajo ka vlerësuar veçanërisht mënyrën se si zëri artistik i autorit dëgjohet fuqishëm përmes veprave, pa nevojën e fjalëve, por përmes emocioneve dhe formës artistike. Ekspozita “Parcelat”, e mbështetur nga Ministria e Kulturës, Rinisë dhe Sportit, dëshmon rëndësinë e përkrahjes institucionale për artin dhe kulturën, si dhe kontributin e artistëve vendorë në pasurimin e identitetit kulturor.
Skender Thaçi mirëpritet në Podujevë
Podujeva mirëpriti kandidatin për deputet nga Alternativa në listën e koalicionit fitues të Lëvizjes Vetëvendosje, Skender Thaçi. Në Galerinë e Arteve u mbajt një ngjarje e rëndësishme kulturore, ku u organizua një tryezë diskutimi mbi Odën si trashëgimi kulturore, me pjesëmarrjen e përfaqësuesve nga Instituti i Albanologjisë dhe Ministria e Kulturës. Ky aktivitet dëshmoi përkushtimin për ruajtjen dhe promovimin e vlerave tona kombëtare. Në hapjen e ekspozitës Thaçi bashkëbisedoi ngrohtësisht me qytetarët dhe pjesëmarrësit nga të cilët u reflektua mbështetja dhe besimi për angazhimin e tij në shërbim të kulturës, artit dhe zhvillimit shoqëror. Ngjarje të tilla forcojnë lidhjen mes institucioneve, artit dhe qytetarëve, duke dhënë mesazhin se kultura mbetet një shtyllë e rëndësishme e shoqërisë sonë.
Prapashtica e tëra përkrah listën e koalicionit të Lëvizjes Vetëvendosje
Banorët e Prapashticës ishin nikoqirë të kandidatëve për deputetë nga lista e fitores, Lëvizja Vetëvendosje, Guxo, Alternativa e PShDK. Me ngrohtësi të jashtëzakonshme bashkëbiseduan me Skender Thaçin, Shqipe Selimin dhe Driton Hysenin, të cilëve iu premtua përkrahje e angazhim deri në fitore të madhe. Mbështetja e fuqishme e banorëve për idetë dhe angazhimet e tyre, u tha se është një motivim i madh për të vazhduar përpara. Së bashku për një Kosovë më të zhvilluar!
Lagjja Kodra e Trimave në përkrahje të kandidatëve për deputetë nga Alternativa
Disa banorë të lagjes Kodra e Trimave në Prishtinë pritën me shumë ngrohtësi kandidatët për deputetë nga Alternativa, pjesë e listës së përbashkët të koalicionit me Lëvizjen Vetëvendosje, Skender Thaçi dhe Diana Qarkaxhija. Atmosfera ishte mbresëlënëse: njëzëri, shprehën mbështetje të fuqishme për këtë koalicion dhe veçanërisht për mysafirët, të cilët u pritën me respekt dhe besim të plotë. Banorët premtuan përkrahje të pakursyer, ndërsa kandidatët tanë theksuan përkushtimin e tyre për të çuar përpara ligjet dhe projektet që përmirësojnë jetën e çdo qytetari të Republikës së Kosovës. Alternativa Liberale, me vizionin e saj modern, mbetet e vendosur t’i japë vendit tonë energji të re, politika zhvillimore dhe një qasje më të hapur për progres. Së bashku për një Kosovë më të zhvilluar!
Vizitë në Shoqatën “Autizmi”
Kandidatët për deputetë nga Alternativa, pjesë e listës së koalicionit të Lëvizjes Vetëvendosje, Skender Thaçi dhe Diana Qarkaxhija, realizuan një vizitë në Shoqatën “Autizmi”. Shoqata, e themeluar në vitin 2011, ofron shërbime ditore për fëmijët me autizëm. Megjithatë, për shkak të pamjaftueshmërisë së mjeteve financiare, aktualisht nuk mund të ofrohet qëndrim tërëditor për fëmijët, theksoi drejtoresha ekzekutive Hatixhe Hoxha. Gjatë takimit, ajo i informoi kandidatët Thaçi dhe Qarkaxhija për sfidat e përditshme në procesin e rehabilitimit, si dhe për paragjykimet që fatkeqësisht vazhdojnë të prekin personat me autizëm. U nënvizua nevoja që politikat sociale të garantojnë përfshirje dhe mbështetje të plotë për këtë komunitet. U rikujtua gjithashtu se ligji për personat me aftësi të kufizuara ka mbetur i bllokuar në Kuvend që nga viti 2016, duke lënë shumë familje pa mbështetjen e nevojshme. Shoqata kërkon nga shteti sigurimin e shërbimeve falas, pasi kostot aktuale janë të papërballueshme për shumë familje. “Ne mbetemi të përkushtuar në mbrojtjen e të drejtave të fëmijëve dhe të rinjve me autizëm dhe në sigurimin e mbështetjes së duhur për këtë komunitet”, janë shprehur ata.
Vizitë në Shoqatën Down Syndrome Kosova
Kandidatët për deputetë nga Alternativa, pjesë e listës së koalicionit të Lëvizjes Vetëvendosje, Skender Thaçi dhe Diana Qarkaxhija, zhvilluan një takim të frytshëm me drejtoreshën e Shoqatës Down Syndrome Kosova, znj. Sebahate Hajdini Beqiri. Gjatë bisedës u diskutua për sfidat me të cilat përballet shoqata dhe komuniteti i personave me sindromën down, si dhe për detyrimin që ka shoqëria jonë në ofrimin e mbështetjes së vazhdueshme dhe dinjitoze. U rikujtua se që nga viti 2016 është iniciuar projekt-ligji për statusin dhe shërbimet për personat me aftësi të kufizuara dhe se mbështetja institucionale mbetet e domosdoshme. “Mbetemi të përkushtuar që, me marrjen e përgjegjësive institucionale, të garantojmë përfundimisht miratimin dhe zbatimin e projektligjit për personat me aftësi të kufizuara, duke siguruar mbrojtje dhe mbështetje të qëndrueshme për ta”, kanë thënë kandidatët për deputetë.
Tri figuara të shquara të Kosovës nga Alternativa garojnë në zgjedhjet e 28 dhjetorit
Alternativa garon në zgjedhjet e 28 dhjetorit si pjesë e listës së koalicionit të Lëvizjes Vetëvendosje, e përfaqësuar nga tri personalitete të shquara të vendit tonë, figura me integritet, përvojë të gjatë në jetën publike dhe vizion të qartë për të ardhmen. Mimoza Kusari-Lila, kryetare e Alternativës – numri 8 Skënder Thaçi – numri 36 Diana Qarkaxhija – numri 79 Këta do të sjellin profesionalizëm, përkushtim dhe energji të re për zhvillimin e vendit dhe përmirësimin e cilësisë së jetës së qytetarëve të Republikës së Kosovës.
Nënshkruhet marrëveshja e Koalicionit LVV, Guxo, Alternativa e PShDK
Alternativa ka nënshkruar Marrëveshjen e Koalicionit me Lëvizjen VETËVENDOSJE!, Partinë Guxo dhe Partinë Shqiptare Demokristiane, një marrëveshje që shënon forcimin e një bashkëpunimi politik të përgjegjshëm, të qëndrueshëm dhe të përqendruar në interesin e qytetarëve. Kryetarja Mimoza Kusari Lila, e cila e ka nënshkruar këtë marrëveshje, ka theksuar se Alternativa mbetet e përkushtuar ndaj misionit të saj liberal për t’i sjellë politikës vlera të reja, profesionalizëm dhe një qasje moderne në qeverisje.
Alternativa, si parti liberale e qendrës, do të garojë në këto zgjedhje në koalicion me Lëvizjen Vetëvendosje, Partinë Guxo dhe PShDK
Këshilli i Përgjithshëm i Alternativës, në mbledhjen e radhës, ka diskutuar rreth përgatitjeve në kuadër të zgjedhjeve të parakohshme që do të mbahen më 28 dhjetor. Me përgjegjësi dhe qartësi politike, po hyjmë në këtë proces zgjedhor të gatshëm për të dhënë kontributin tonë në një ofertë të përbashkët që synon ndryshim pozitiv e më të mirë për vendin. Alternativa, si parti liberale e qendrës, do të garojë në këto zgjedhje në koalicion me Lëvizjen Vetëvendosje, Partinë Guxo dhe PShDK, duke bashkuar energjitë, vizionin dhe vullnetin për t’i ofruar qytetarëve një opsion serioz dhe të përgjegjshëm politik. Së shpejti do të bëhen publikë edhe kandidatët për deputetë të Alternativës, të cilët do të jenë pjesë e listës së përbashkët për zgjedhjet e 28 dhjetorit. Kandidatë profesionistë, të përkushtuar dhe të gatshëm të përfaqësojnë me dinjitet vlerat tona. Alternativa është e gatshme, e përgatitur dhe optimiste për këtë garë. Me vizion të qartë dhe me besim në punën tonë, po hyjmë në këto zgjedhje me bindjen se së bashku mund të ndërtojmë një të ardhme më të mirë për të gjithë qytetarët.











