Zëvendësministri i Zhvillimit Rajonal, z. Ali Tafarshiku, përfaqësues i Alternativës, ka vizituar Klinën dhe është njoftuar nga afër me dinamikën e punimeve që po zhvillohen në projektin kapital me gjatësi prej 2.5 km, në hyrje të këtij qyteti. Ministria e Zhvillimit Rajonal, po bashkëfinancon këtë projekt në të cilin po punohet për rregullimin e trotuarëve, shtigjeve të çiklizmit, hapësirave të gjelbërta, ndriçimit publik, zgjerimit të rrugës dhe infrastrukturës nëntoksore. Zv/ministri Tafarshiku me këtë rast ka thënë se çdo gjë po shkon mbarë, me cilësi dhe intensitet të shtuar. “Mirëmëngjes nga Klina, ku po investojmë në trotuare, staza të çiklizmit, hapësira të gjelbërta, ndriçim publik, zgjerim të rrugës dhe infrastrukturë nëntoksore. Ministria e Zhvillimit Rajonal, po bashkëfinancon projektin kapital në gjatësi prej 2.5 km, në hyrje të Klinës. Me këtë rast, sot u njoftova nga afër me zhvillimin e punimeve atje dhe jam i lumtur që çdo gjë po shkon mbarë me cilësi dhe intenzitet të shtuar. Alternativa për projekte zhvillimore!”, ka theksuar zv/ministri Tafarshiku. Zoti Tafarshiku ka qëndruar edhe në Skenderaj, komunë kjo në të cilën MZhR-ja po bashkëfinancon në ndërtimin e çerdhes së dytë publike me kapacitet për afër 100 fëmijë. Zëvendësministri ka vlerësuar se punimet po zhvillohen në mënyrë cilësore dhe të shpejtë, andaj sipas tij, fundi i vitit 2024, Skenderajn e gjen me çerdhe të re. Nga drejtoresha e Zhvillimit Ekonomik, znj. Besarta Meha dhe zyrtarë komunal ai është informuar se numri i kërkesave për vijimin e fëmijëve në çerdhe publike ka arritur në 300, andaj investimi në këtë projekt përpos që do të zvogëloj numrin e kërkesave, do të ndikoj edhe në fuqizimin ekonomik të grave. “Në Skenderaj po investojmë në ndërtimin e çerdhes publike, me kapacitet për afër 100 fëmijë. Kjo është çerdhja e dytë publike në këtë komunë dhe ky projekt bashkëfinancohet nga Ministria e Zhvillimit Rajonal. Punimet atje po zhvillohen në mënyrë cilësore dhe të shpejtë, andaj fundi i vitit 2024, Skenderajn e gjen me çerdhe të re. Gjatë vizitës që ju bëra punimeve atje, nga drejtoresha e Zhvillimit Ekonomik, znj. Besarta Meha dhe zyrtarë komunal, u njoftova që numri i kërkesave për vijimin e fëmijëve në çerdhe publike ka arritur në 300, andaj investimi në këtë projekt përpos që do të zvogëloj këtë numër, do të ndikoj edhe në fuqizimin ekonomik të grave në Komunën e Skenderajt. Alternativa për Komunat”, ka theksuar z. Tafarshiku.
Zëvendësministri i MFPT-së Agon Dobruna mori pjesë në konferencën “Avancimi i politikave për personat me aftësi të kufizuara në Kosovë’’
Shoqata “Handikos” të hënën organizoi konferencën me temën “Avancimi i politikave për personat me aftësi të kufizuara në Kosovë’’. I pranishëm ishte edhe zëvendësministri i ministrisë së Financave Punës dhe Transfereve të Republikës së Kosovës, Agon Dobruna, përfaqësues i Alternativës. Me këtë rast ai ka theksuar veprimet që ka ndërmarrë MFPT-ja për fuqizimin dhe mbështetjen e personave me aftësi të kufzuara si në fushën legjislative ashtu edhe në aspektin financiar. Në konferencën përmbyllëse janë trajtuar çështje të rëndësishme për shoqërinë tonë dhe avancimin e politikave për personat me aftësi të kufizuara. “Projekte si “Aleanca për Reforma Gjithëpërfshirëse në Rajon” janë thelbësore për të siguruar progres konkret dhe për t’i adresuar nevojat specifike të kësaj kategorie të shoqërisë. Biseduam së bashku dhe dëgjuam të gjitha kërkesat dhe pyetjet që kishin të pranishmit. Gjithashtu theksova hapat dhe veprimet që ka ndërmarrë Ministria e Financave, Punës dhe Transfereve, për fuqizimin dhe mbështetjen e personave me aftësi të kufzuara, si në fushën legjislative ashtu edhe në aspektin financiar”, është shprehur zv/ministri Dobruna. Ai para të pranishmëve edhe një herë ka kujtuar se së bashku, do të ndërtojnë një shoqëri, ku të gjithë qytetarët e saj ndihen të përfshirë dhe të fuqizuar pa asnjë dallim.
Zëvendësministri i MZhR-së Ali Tafarshiku vizitoi dy komuna, pa nga afër ecurinë e projekteve
Zëvendësministri i ministrisë së Zhvillimit Rajonal, Ali Tafarshiku përfaqësues i Alternativës, në vazhdën e vizitave nëpër zona të ndryshme të Kosovës të hënën ka parë nga afër punimet të cilat janë duke u zhvilluar në ndërtesën e Stacionit të Autobusëve në Gjakovë, investime këto të cilat po realizohen në kuadër të projekteve të financuara nga MZhR-ja. “Java nis mbarë me imazhe të punëve që po realizohen në projektet e financuara nga Ministria e Zhvillimit Rajonal. Ndërtesa e Stacioni Autobusëve Gjakovë tashmë po rinovohet, kurse shërbimet për qytetarë po digjitalizohen”, ka thënë ai. Tafarshiku ka qëndruar edhe në Sllatinë të Komunës së Fushë Kosovës ku është interesuar të mësojë mbi ecurinë e punimeve në “Parkun e Pishave” ku MZhR-ja aktualisht po investon në terrene sportive, kënde lodrash për fëmijë dhe në krijimin e hapësirave rekrative. “Në “Parkun e Pishave” në Sllatinë, ku po investojmë në terene sportive dhe kënde lodrash për fëmijë. Parku i Pishave është shndërruar në atraksion për të gjitha grupmoshat që vinë nga çdo cep i vendit. Ministria e Zhvillimit Rajonal, përmes investimeve të tilla, ka për qëllim promovimin jo vetëm të resurseve natyrore, por edhe të jetës së shëndetshme, përmes investimeve në fusha sportive dhe në krijimin e hapësirave rekreative”, ka thënë mes tjerash zv/ministri Tafarshiku.
Kryetarja Mimoza Kusari –Lila pjesëmarrëse në Dialogue Academy të OSCE Mission in Kosovo
Kryetarja e Alternativës dhe shefe e Grupit Parlamentar, të Lëvizjes Vetëvendosje, Mimoza Kusari Lila ka marrë pjesë si folëse në Dialogue Academy të OSCE Mission in Kosovo që është mbajtur të dielën në Gorozia të Italisë. Këtë vit, akademia feston 10-vjetorin dhe është organizuar nën mbikëqyrjen e misioneve të OSBE-së nga Kosova dhe Serbia. “Një përvojë unike për mua është pjesëmarrja si folëse në Dialogue Academy të OSCE Mission in Kosovo një angazhim që po e vazhdoj tash e tri vite, duke shënuar kështu një moment të rëndësishëm për takimet e vajzave të reja nga Kosova dhe Serbia’, ka thënë Kusari Lila. “Nën moderimin e Cornelia Taylor, e Ngarkuara me Punë nga OSBE në Kosovë, mora pjesë në një panel që trajtoi temën e lidershipit të grave në shoqëritë e ndara dhe sfidat e dialogut. Paneli përfshinte tri gratë iniciatore të nismës “Folloë Us” – Teuta Sahatqija, Gordana Çomic, Marija Obradoviç si dhe Liliana Palihovici, ish-deputete e Parlamentit të Moldovës dhe përfaqësuese speciale e OSBE-së për çështjet gjinore”, është shprehur Kusari-Lila. Më tej kryetarja Mimoza Kusari – Lila ka theksuar se ajo që e frymëzon është energjia, përkushtimi dhe pasioni i këtyre vajzave të reja për barazi në shoqëri, kërkesat e tyre për llogaridhënie nga politikanët dhe vizioni i tyre për një jetë më të mirë. “Si folëse, nuk ndiej vetëm se po ndaj përvojat e mia me to, por edhe marr energji dhe inspirim prej tyre, duke i dhënë një kuptim më të thellë punës që bëj çdo ditë. Vajzat po ndryshojnë botën për të mirë, dhe është detyra jonë t’i ndihmojmë ato të kenë hapësirën për të sjellë këto ndryshime. Mjafton një grup me guxim dhe vizion të qartë, të tjerët do t’i ndjekin”, ka thënë ajo.
Zëvendësministri i MFPT-së, Dobruna: Personat paraplegjik dhe tetraplegjik, do të kenë procedura më të lehta
Zëvendësministri i Ministrisë së Financave, Punës dhe Trasfereve, Agon Dobruna ka vizituar të enjten përfaqësuesit e shoqatës së të verbërve “ Gjakova” dhe ata të shoqatës “Handikos” në Gjakovë. Gjatë takimeve dhe gjatë prezantimit të punës dhe aktiviteteve të Ministrisë që përfaqëson, Dobruna ka thënë se me rastin e shënimit të “Javës Ndërkombëtare të Njeriut me Shkop të Bardhë” ka vizituar përfaqësuesit e shoqatës “Gjakova” duke u interesuar më shumë për sfidat që ata kalojnë deri sa kanë biseduar për vizionin e përbashkët dhe për avancimin e statusit të tyre në jetën socio – ekonomike. “Me rastin e shënimit të “Javës Ndërkombëtare të Njeriut me Shkop të Bardhë”, vizitova shoqatën e personave të verbër në Gjakovë. Bashkëbiseduam me përfaqësuesit e shoqatës për kushtet e tyre, sfidat dhe vizionin tonë të përbashkët për avancimin e statusit të tyre në jetën socio – ekonomike!”, ka thënë Dobruna. Ndërsa në shoqatën “Handikos” ka takuar personat paraplegjik dhe tetraplegjik, për të cilët ka thënë se do të kenë procedura më të lehta, kushte më të mira, nuk do t’i nënshtrohen rivlerësimit, do të kenë mundësi më të lehta për të siguruar kujdestar personal dhe social. “Me qëllim të prezantimit të risive pozitive, të dala nga Rregullorja e re e aprovuar nga Qeveria për Personat Paraplegjik/Tetraplegjik, vizitova edhe degën e Handikos-it në Gjakovë, ku takova dhe bashkëbisedova me një numër të konsiderueshëm të personave paraplegjik dhe kujdestar të personave tetraplegjik. Personat paraplegjik dhe tetraplegjik, do të kenë procedura më të lehta, kushte më të mira, nuk do t’i nënshtrohen rivlerësimit, do të kenë mundësi më të lehta për të siguruar kujdestar personal dhe social! Përveç rritjes së pensioneve të cilat u realizuan së fundi, evidentuam edhe shumë çështje për adresim në të ardhmen!’’, ka thënë mes tjerash Dobruna. Në emër të MFPT, Zëvendësministri dhe nënkryetari Alternativës, Dobruna ka falënderuar këto dy shoqata për pritjen, bashkëbisedimin dhe shfaqjen e shqetësimeve. I pranishëm ishte edhe nënkryetari i degës së Alternativës, Hysen Berisha.






