Ministrja e Industrisë, Ndërmarrësisë, Tregtisë dhe Inovacionit, znj. Mimoza Kusari-Lila kryetare e Alternativës, të martën ka zhvilluar një takim të rëndësishëm me German Economic Team (GET), projekt disavjeçar pranë MINTI-t, ku u riafirmua përkushtimi për thellimin e bashkëpunimit në funksion të mbështetjes së bizneseve dhe zhvillimit ekonomik të vendit. Ministrja theksoi se së bashku me GET-in do të vazhdohet puna për një mjedis të qëndrueshëm, me mundësi të reja zhvillimi. “Fokusi ynë do të jetë në zhvillimin e parqeve industriale të gjelbra, për të mundësuar një tranzicion të mirëfilltë drejt ekonomisë së gjelbër. Investimet në ekonominë qarkore dhe në energjinë nga burime alternative nuk janë më opsion – janë domosdoshmëri për të ardhmen ekonomike të Kosovës”, tha ministrja Kusari-Lila. Ajo bëri të ditur se partneriteti me miqtë ndërkombëtarë po përkthehet në politika konkrete, mbështetje për bizneset dhe zhvillim afatgjatë për vendin.
Kusari Lila: MINTI është ura lidhëse mes politikave zhvillimore të Qeverisë dhe sektorit privat
Fillojnë takimet me përfaqësuesit e organizatave të biznesit për të forcuar dialogun e strukturuar dhe për të rritur efikasitetin në zbatimin e reformave. Ministrja e Industrisë, Ndërmarrësisë, Tregtisë dhe Inovacionit znj. Mimoza Kusari Lila, kryetare e Alternativës ka thënë se MINTI është ura lidhëse mes politikave zhvillimore të Qeverisë dhe sektorit privat. ” Angazhimi ynë është që politikat pro-biznes të mos mbesin vetëm në letër, por të përkthehen në masa konkrete që ndikojnë drejtpërdrejt në rritjen ekonomike. Në këtë kuadër, kemi nisur takimet me përfaqësuesit e organizatave të biznesit për të forcuar dialogun e strukturuar dhe për të rritur efikasitetin në zbatimin e reformave. Sot takova përfaqësuesit e Dhomës së Tregtisë dhe Industrisë. Me drejtorin Kushtrim Ahmeti dhe përfaqësuesit e kësaj dhome u dakorduam për thellimin e bashkëpunimit, me fokus në adresimin e barrierave për bizneset, rritjen e prodhimit vendor dhe avancimin e konkurrueshmërisë”, ka thënë ajo. Kusari Lila ka theksuar rolin kyç që kjo dhomë ka si përfaqësuese e interesave të sektorit privat dhe si partnere në ndërtimin e politikave që nxisin zhvillim të qëndrueshëm ekonomik. “Rikonfirmova mbështetjen time të plotë për fuqizimin e bizneseve private, me synim rritjen e eksporteve, tërheqjen e investimeve vendore dhe ndërkombëtare, si dhe krijimin e një klime më të favorshme për ndërmarrësi në Republikën e Kosovës”, ka thënë ministrja Mimoza Kusari Lila.
Nënshkruhet kërkesa për përshpejtimin e miratimit të Projektligjit për Inovacion dhe Ndërmarrësi
Ministrja e MINTI -it znj. Mimoza Kusari-Lila nënshkroi kërkesën për përshpejtimin e miratimit të Projektligjit për Inovacion dhe Ndërmarrësi, i cili pas miratimit në Kuvend hap rrugën për krijimin e Fondit për Inovacion. Kryetarja e Alternativës, ministre e MINTI -it ka thënë se, ky hap është ndërmarrë në kuadër të reformave që burojnë nga Plani i Rritjes me BE-në, synon forcimin e mbështetjes për ndërmarrjet, inovacionin dhe ekonominë kreative, ndërsa në ditët në vijim pritet të organizohet një forum diskutimi me aktorë kyç për të trajtuar vërejtjet dhe sugjerimet lidhur me Projektligjin. “Sot nënshkrova kërkesën për përshpejtimin e miratimit të Projektligjit për Inovacion dhe Ndërmarrësi. Pas miratimit të tij në Kuvendin e Republikës, hapet rruga për krijimin e Fondit për Inovacion. Ky është një hap i rëndësishëm në kuadër të reformave që burojnë nga Plani i Rritjes me BE-në. Në ditët në vijim do të organizohet një forum diskutimi me aktorë kyç, për të adresuar vërejtjet dhe sugjerimet e tyre lidhur me Projektligjin”, ka theksuar ministrja Mimoza Kusari Lila. “Me politika që kanë në fokus ndërmarrjet e reja dhe ato ekzistuese, si dhe zhvillimin e inovacionit dhe kreativitetit, do të ofrohet më shumë mbështetje për inovacionin, ndërmarrësinë dhe ekonominë kreative”, është shprehur ajo.
Takim me ambasadorin e Austrisë në Kosovë Schnetzer
“Në vizitën e tij të parë në këtë mandat timin si Ministre e MINTI-t, bashkë me ambasadorin e Austrisë në Kosovë, Georg Schnetzer, diskutuam për mundësitë e zhvillimit të mëtejmë të ekonomisë së vendit tonë, bashkëpunimin bilateral me Republikën e Austrisë, si dhe trajtuam projektet e deritashme të mbështetura nga shteti austriak për Kosovën”, kështu është shprehur znj. Mimoza Kusari Lila pas takimit që ka pasur me Shkëlqesinë e tij, ambasadorin e Austrisë në Kosovë z. Georg Schnetzer. “Austria mbetet një ndër partnerët seriozë të Kosovës në shkëmbimet tona tregtare, prandaj edhe fushat e bashkëpunimit në sektorin privat janë të shumta”, ka shtuar ministrja e MINTI-it, Kusari Lila. Ajo ka theksuar se, tranzicioni i gjelbër dhe lëvizja drejt ekonomisë së qëndrueshme, mbi parime mjedisore, mbeten fokus dhe objektiv kyç i MINTI-t; andaj vazhdimin e bashkëpunimit me shtetin e Austrisë e shohim afatgjatë dhe të qëndrueshëm.
Kusari-Lila e Nuno Queiros diskutojnë për thellimin e partneritetit
Kryetarja e Alternativës ministre e Ministrisë së Industrisë, Ndërmarrësisë, Tregtisë dhe Inovacionit znj. Mimoza Kusari-Lila, priti në takim Përfaqësuesin e Përhershëm të Programi i Kombeve të Bashkuara për Zhvillim (UNDP), Nuno Queiros. Gjatë takimit u diskutua thellimi i partneritetit për ngritjen e kapaciteteve institucionale, mbështetjen e produkteve vendore “Made in Kosova” dhe përkrahjen e bizneseve të vogla dhe të mesme. Bashkëpunimi me UNDP-në u vlerësua si i rëndësishëm për avancimin e agjendës për zhvillim ekonomik, inovacion dhe rritjen e konkurrueshmërisë në vend. “Sot në zyrën time prita në takim Përfaqësuesin e Përhershëm të Programit të Kombeve të Bashkuara për Zhvillim (UNDP), Nuno Queiros. Diskutuam për thellimin e partneritetit në ngritjen e kapaciteteve të ministrisë, mbështetjen e produkteve vendore “Made in Kosova” dhe, në fokus të veçantë, mbështetjen e bizneseve të vogla dhe të mesme”, ka theksuar Kusari Lila. “Bashkëpunimi me UNDP-në mbetet i rëndësishëm për avancimin e agjendës sonë për zhvillim ekonomik dhe inovacion në vend, si dhe për rritjen e konkurrueshmërisë së bizneseve të vogla dhe të mesme”, është shprehur ajo në këtë takim.
Kusari-Lila, ka nënshkruar inicimin e procedurës për Projektligjin për masat e përkohshme të produkteve themelore në rast të krizave ekonomike
Pas miratimit të agjendës legjislative në Qeverinë e Kosovës dhe në përputhje me premtimin e Kryeministrit Albin Kurti, Ministrja e Industrisë, Ndërmarrësisë, Tregtisë dhe Inovacionit, njëherësh kryetare e Alternativës, Mimoza Kusari-Lila, ka nënshkruar inicimin e procedurës për Projektligjin për masat e përkohshme të produkteve themelore në rast të krizave ekonomike. Projektligji synon të krijojë bazë ligjore për ndërhyrje të shpejtë dhe të drejtë në rast të rritjes së papritur të çmimeve, mungesës së produkteve apo çrregullimeve në furnizim. Qëllimi i tij është mbrojtja e konsumatorëve nga abuzimi dhe spekulimi gjatë krizave, përmes masave të përkohshme dhe proporcionale. “Pas miratimit të agjendës legjislative në Qeverinë e Kosovës, duke pasur parasysh rëndësinë e këtij projektligji dhe premtimin e Kryeministrit Kurti për miratimin e tij që në fillim të mandatit të ri, sot nënshkrova incimin e procedurës për Projektligjin për masat e përkohshme të produkteve themelore në rast të krizave ekonomike (Ligji për çmimet tavan). Ky është një hap i domosdoshëm për të mbrojtur konsumatorin dhe për të garantuar stabilitet në treg”, ka njoftuar ministrja Kusari Lila. Ajo ka theksuar se, ky projektligj krijon bazën ligjore për ndërhyrje të shpejtë dhe të drejtë kur përballemi me: – rritje të papritura të çmimeve – mungesë të produkteve themelore – çrregullime në furnizim “Qëllimi nuk është ndërhyrja arbitrare në treg, por mbrojtja e qytetarëve nga abuzimi dhe spekulimi në kohë krize. Masat janë të përkohshme, proporcionale dhe të orientuara drejt ruajtjes së stabilitetit ekonomik”, ka thënë ajo. “Duke adresuar edhe vërejtjet e Gjykatës Kushtetuese nga e kaluara, po ndërtojmë një kornizë më të fortë, më të qëndrueshme dhe ligjërisht solide. Në një periudhë kur inflacioni ka prekur çdo familje, shteti duhet të jetë garant i balancës mes tregut të lirë dhe interesit publik”, është shprehur ajo.
Kusari-Lila: Tranzicioni energjetik dhe zhvillimi i qëndrueshëm nuk mund të arrihen pa përfshirjen e plotë të grave, jo vetëm si pjesëmarrëse, por edhe si vendimmarrëse dhe lidere të proceseve transformuese
Në ngjarjen e organizuar nga AmCham Kosovo me rastin e 4-vjetorit të Komitetit “Kosovo Women in Energy and Mining” ka folur edhe kryetarja e Alternativës, ministre e Ministrisë së Industrisë, Ndërmarrësisë, Tregtisë dhe Inovacionit, znj. Mimoza Kusari Lila. “Në panelin e moderuar nga Shqipe Vela, kryesuese e rrjetit, ishim bashkë me të Ngarkuarën me Punë të SHBA-së, Annu Prattipati, Zëvendësshefen e Zyrës së BE-së në Kosovë, Eva Palatova, Drejtorin e ri të zgjedhur të KOSTT, Trim Tërnava, si dhe, drejtorin e AmCham Kosova, Arian Zeka. Bashkë patëm një diskutim të hapur dhe shumë të nevojshëm për të ardhmen e sektorit”, ka thënë mes tjerash ministrja Kusari-Lila. Ajo ka theksuar se tranzicioni energjetik dhe zhvillimi i qëndrueshëm nuk mund të arrihen pa përfshirjen e plotë të grave, jo vetëm si pjesëmarrëse, por edhe si vendimmarrëse dhe lidere të proceseve transformuese. “Energjia dhe minierat nuk janë sektorë “tradicionalisht mashkullorë”, janë sektorë strategjikë, dhe strategjia kërkon gjithë përfshirje”, ka thënë ajo. “Informova gjithashtu për projektet që po i zhvillojmë në kuadër të Ministrisë së Industrisë, Ndërmarrësisë, Tregtisë dhe Inovacionit,, me fokus në industrinë vendore, inovacionin dhe ekonominë qarkore si bazë për rritje të qëndrueshme. Shpreha gatishmërinë për bashkëpunim të ngushtë me gratë dhe vajzat e sektorit dhe i ftova profesionistet që të angazhohen drejtpërdrejt me Ministrinë që drejtoj”, është shprehur po ashtu ministrja e MINTI-it. “Dyert janë të hapura për ide konkrete dhe partneritete që sjellin ndryshim real. Urime WEM për 4 vite punë të jashtëzakonshme, rruga vazhdon, dhe duhet ta bëjmë bashkë”, ka theksuar ajo mes tjerash në këtë ngjarje.
Ministrja Kusari Lila takon Shefin e Misionit të Ambasadës së Dukatit të Madh të Luksemburgut në Kosovë, Ambasadorin Eric Dietz
Ministrja e Ministrisë së Industrisë, Ndërmarrësisë, Tregtisë dhe Inovacionit, kryetare e Alternativës znj. Mimoza Kusari Lila ka pritur në takim Shefin e Misionit të Ambasadës së Dukatit të Madh të Luksemburgut në Kosovë, Ambasadorin Eric Dietz. “Shteti i Luksemburgut, përmes organizatës për zhvillim LuxDev, ka mbështetur dhe vazhdon ta mbështesë Republikën e Kosovës në sektorët e shëndetësisë, arsimit dhe sektorit privat. Ministria e Industrisë, Ndërmarrësisë, Tregtisë dhe Inovacionit është përfituese e kësaj asistence në fushën e ndërmarrësisë dhe inovacionit, si dhe në sektorin e aftësimit profesional, në kuadër të një projekti të përbashkët me Ministrinë e Arsimit”, ka theksuar Kusari Lila. Ajo ka theksuar se, gjatë takimit, kanë diskutuar për thellimin e bashkëpunimit dypalësh dhe vazhdimësinë e projekteve të përbashkëta, me fokus në forcimin e kapaciteteve institucionale dhe zhvillimin e qëndrueshëm ekonomik. “Shkëmbimi i përvojave më të mira ndërmjet dy shteteve tona mbetet një shtyllë e rëndësishme e këtij partneriteti”, ka thënë ajo. “Republika e Kosovës mbetet e përkushtuar për të thelluar partneritetin strategjik me Luksemburgun, duke vlerësuar lart mbështetjen e deritanishme dhe duke synuar zgjerimin e bashkëpunimit në fusha me interes të përbashkët”, është shprehur ministrja Kusari Lila.
Kryetarja e Alternativës, ministre e MINTI-it znj. Mimoza Kusari-Lila, ka përcjellë urimin e saj me rastin e Ditës së Pavarësisë së Kosovës
Ëndrra shekullore e shqiptarëve u bë realitet dhe amaneti i të rënëve u përmbush me shpalljen e Republikës së Kosovës, shtet i pavarur dhe sovran, në këtë ditë historike 18 vite më parë. Ky përvjetor e gjen Republikën e Kosovës me arritje të prekshme dhe suksese të ndërtuara mbi sakrificën e dëshmorëve dhe përkushtimin e brezave që luftuan për liri. Çdo hap përpara mban brenda tij gjurmën e atyre që besuan në një Kosovë të lirë. Liria për të cilën sakrifikuam kaq shumë kërkon përditë përkushtim. Ajo kërkon demokraci funksionale, institucione të forta dhe zë të garantuar për çdo qytetar, pa dallim. Sot kemi shtet që forcon sundimin e ligjit, mbron të drejtat e njeriut dhe respekton dinjitetin e çdo komuniteti. Republika jonë është më e fortë se kurrë. Ekonomia po rritet me ritme të qëndrueshme, rendi dhe ligji po konsolidohen, ndërsa po ndërtojmë një shtet solidar që kujdeset për qytetarët e vet. Rruga jonë nuk ka qenë e lehtë, por ka qenë e drejtë. Ky është përvjetori i pestë në të cilin mungojnë krerët e Ushtrisë Çlirimtare të Kosovës, të cilët po përballen me një proces të padrejtë ndaj luftës së UÇK-së dhe vullnetit të popullit nga i cili ajo lindi. Por historia nuk mund të ndryshohet dhe drejtësia nuk mund të manipulohet. E vërteta e sakrificës sonë është e rrënjosur thellë në ndërgjegjen e këtij kombi. Rruga jonë drejt lirisë dhe shtetit të pavarur është e pastër, e drejtë dhe e mbështetur mbi vlerat demokratike dhe idealin e lirisë. I përjetshëm është shteti ynë e ne lartësofshim e nderofshim emrin Kosovë!
“Konventa Euro Ballkanike e Alpeve” – Valbonë, 15–16 Maj 2026
Me moton “Zhvillimi dhe Integrimi i Alpeve”, kjo Konventë shënon një moment historik për Shqipërinë dhe rajonin. E organizuar në zemër të Valbonës, kjo është: a) veprimtaria e parë dhe e vetme e këtij lloji në Shqipëri dhe në Ballkanin Perëndimor; b) përpjekja e parë serioze për të integruar shtetet alpine të Ballkanit Perëndimor me shtetet alpine të Evropës së Mesme. Katër shtyllat e Konventës: Ekonomia • Kultura • Mjedisi • Turizmi Të ftuar nderi nga shtetet alpine të Ballkanit Perëndimor dhe Evropës së Mesme: Shqipëria, Austria, Bosnje-Hercegovina, Franca, Gjermania, Italia, Lihtenshtejni, Kroacia, Kosova, Mali i Zi, Monako, Lugina e Preshevës, Sanxhaku i Novi Pazarit, Sllovenia, Zvicra, si dhe përfaqësues nga Bashkimi Europian (BE) dhe Banka Botërore (BB). Konventa organizohet nga Qendra Alpine për Studime, Botime, Kulturë, Mjedis dhe Turizëm, në bashkëpunim dhe bashkërendim me Bashkinë Tropojë. Ndër organizatorët e kësaj Konvente është edhe Skënder Thaçi, nga Kryesia e Alternativës, anëtar i Komitetit Nërkombëtar Organizues (për Republikën e Kosovës), duke kontribuar në realizimin e kësaj nisme me rëndësi strategjike për zhvillimin dhe integrimin e Alpeve tona në rrjetin evropian.











