Ministrja Kusari-Lila shpalosi politikat që do t’i zhvillojë edhe më shumë fushat e industrisë, ndërmarrësisë, tregtisë dhe inovacionit, si dhe fushat tjera që janë në kuadër të ministrisë. Fushë me interes të veçantë, ministrja potencoi përkujdesjen e veçantë ndaj mbrojtjes së konsumatorit, që do ta ketë prioritet. Ajo i informoi udhëheqëset/it se të gjitha planifikimet dhe nismat legjislative do të kenë rishikim të plotë për t’i përfshirë në planifikimet e reja, që janë në përshtatshmëri me nevojat kohës. Ata e njoftuan ministren për politikat dhe projektet e tyre, që janë paraparë të realizohen sipas planeve të planifikuara. E njoftuan ministren edhe për sfidat me të cilat janë ballafaquar dhe vazhdojnë të ballafaqohen, e që koordinimi më i mirë i tyre në mes të gjithë akterëve të ministrisë do të ndikojë në eliminimin e barrierave. Angazhimi konkret në eliminimin e këtyre barrierave do të ketë ndikim konkret në zhvillimin e politikave të reja, që do të kenë ndikim në zhvillimin e gjithmbarshëm ekonomik të vendit. Ministrja Kusar-Lila theksoi se në veçanti do të angazhohet maksimalisht për përcjelljen e trendeve të zhvillimeve të përgjithshme, që janë në interes të publikut. “Sot, në ditën e parë të javës së re, u takova me drejtorët e departamenteve dhe kryeshefat e agjencive në kuadër të Ministrisë së Industrisë, Ndërmarrësisë, Tregtisë dhe Inovacionit. Para drejtuesve të lartë të shërbimit civil, shpalosa prioritetet e këtij mandati dhe u njoftova nga afër me të arriturat, sfidat dhe obligimet që na presin”, është shprehur ajo. “Bashkë, me komunikim të hapur, transparencë dhe përgjegjësi të plotë institucionale, do të punojmë me vendosmëri për rezultate konkrete në shërbim të të gjithë qytetarëve, pa dallim”. “Ky mandat kërkon ritëm, bashkërendim dhe guxim për vendime që forcojnë zhvillimin ekonomik dhe mbështesin ndërmarrësinë vendore”, ka thënë mes tjerash ajo.
Kryetarja e Alternativës, znj. Mimoza Kusari-Lila mori detyrën e ministres së Industrisë, Ndërmarrësisë, Tregtisë dhe Inovacionit
Në Ministrinë e Industrisë, Ndërmarrësisë, Tregtisë dhe Inovacionit u bë dorëzim-pranimi nga ministrja e deritashme Rozeta Hajdari duke ia dorëzuar detyrën tashmë ministres, Mimoza Kusari-Lila. Gjatë kësaj ceremonie, ministrja e deritashme Rozeta Hajdari bëri një përmbledhje të punëve dhe projekteve, që janë realizuar gjatë qeverisjes së saj katërvjeçare, duke përfshirë arritjet në sektorin e tregtisë, industrisë, ndërmarrësisë dhe fushave të tjera që mbulohen nga ministria. Ndërkaq, ministrja Mimoza Kusari-Lila e falënderoi ministren Hajdari për angazhimin e saj gjatë kësaj periudhe dhe potencoi se do të vazhdojë të punojë me përkushtim për zhvillimin e fushave që janë në kuadër të ministrisë. “Pas 15 viteve rikthehem në krye të Ministrisë së Tregtisë, Industrisë, Ndërmarrësisë dhe Inovacionit. Sot zyrtarisht pranova detyrën nga ministrja e deritashme dhe deputetja e zgjedhur e Kuvendit të Kosovës, Rozeta Hajdari”, ka thënë mes therash ajo. “E bindur se me përkushtim, energji dhe vizion do të vazhdojmë drejt një ekonomie të qëndrueshme, me politika mbështetëse për sektorin privat, start-up-et, fuqizimin ekonomik të grave, forcimin dhe brendimin e produkteve “Made in Kosova”, si dhe ngritjen e eksportit dhe rritjen e produktivitetit të prodhimit kosovar. Incentivizimi i bizneseve për të punuar me politka miqësore mjedisore, duke promovuar ekonominë qarkore, do të kenë fokusin tim të veçantë. Vendi ynë pasurinë më të çmuar i ka të rejat dhe të rinjtë, të cilët me kreativitetin dhe talentin e tyre kanë zhvilluar dhe rritur sektorin e inovacionit – sektor që tashmë është pjesë e këtij dikasteri”. “Dialogu publiko-privat dhe sinergjia e krijuar përmes ndërlidhjes dhe koordinimit të të gjithë sektorëve do të sjellin vlerë të shtuar për ekonominë e vendit. E lumtur të jem pjesë e zhvillimit dhe suksesit të shtetit tonë”, është shprehur Kusari-Lila.
Kryetarja e Alternativës Mimoza Kusari-Lila dhe Kryeministri Albin Kurti vizituan Qendrën Inovative të Kosovës
Kryetarja e Alternativës, znj. Mimoza Kusari-Lila, së bashku me Kryeministrin e Republikës së Kosovës, z. Albin Kurti, kanë vizituar Qendrën Inovative të Kosovës (ICK), në kuadër të angazhimit për mbështetjen e inovacionit dhe zhvillimit të ekonomisë digjitale në vend. “Bashkë me Kryeministrin Albin Kurti vizituam Qendrën Inovative të Kosovës (ICK), një histori e konsoliduar suksesi që prej vitesh ndërton themelet e ekonomisë digjitale në Kosovë. Me mbi 15 vite përvojë, qindra startup-e të mbështetura dhe mijëra të rinj të aftësuar, ICK dëshmon se investimi në inovacion dhe dije është investim direkt në konkurrueshmërinë dhe të ardhmen e vendit”, ka theksuar Kusari Lila. “Pas vizitës dhe një bisede të shkurtër, patëm rastin të ndjekim edhe prezantimin “Kosovo Digital Economy Overview”, me fokus në Digital Economy Data, i cili ofroi një pasqyrë të qartë mbi rritjen e sektorit digjital, potencialin e tregut, dhe rolin kyç që të rinjtë dhe teknologjia po luajnë në transformimin ekonomik të Kosovës”, ka thënë mes tjerash ajo. Kryetarja Mimoza Kusari Lila ka theksuar se do të vazhdojmë të ndërtojmë partneritete që mbështeten në të dhëna, inovacion dhe vizion afatgjatë. “Ekonomia digjitale nuk është më e ardhme, është realitet”, ka theksuar ajo.
Në 27-vjetorin e rënies së dëshmorëve Memë dhe Prend Lleshi është nderuar sakrifica e tyre
Kryetarja e Alternativës, deputetja Mimoza Kusari-Lila bashkë me Kryeministrin e Republikës së Kosovës, z. Albin Kurti, familjarë të dëshmorëve e bashkëpunëtorë kanë bërë homazhe në përvjetorin e rënies së tyre. “Në 27-vjetorin e rënies së tyre, sot nderuam me respekt dhe mirënjohje të thellë sakrificën e dëshmorëve Memë dhe Prend Lleshi, të cilët dhanë jetën për lirinë e Kosovës. Kujtimi për ta u bë në praninë e Kryeministrit të Republikës së Kosovës, z. Albin Kurti, familjarëve të dëshmorëve Lleshi, bashkëluftëtarëve, bashkëpunëtorëve nga Kuvendi dhe Qeveria e Kosovës, si dhe bashkëvendasve nga Komuna e Gjakovës dhe komunat tjera”, është shprehur Kusari Lila. Ajo ka theksuar se, janari i vitit 1999 mbetet i shënuar me gjakun e dëshmorëve, veçanërisht në epopenë e Rogovës së Hasit, si një nga kapitujt më të dhimbshëm dhe më heroikë të luftës sonë çlirimtare. “Rënia e Memë dhe Prend Lleshit është dëshmi e përhershme e qëndresës, trimërisë dhe sakrificës sublime për liri. Kujtimi për ta dhe për të gjithë dëshmorët e kombit mbetet obligim moral dhe institucional i yni, që amaneti i tyre të jetojë përmes punës dhe përkushtimit për zhvillimin dhe drejtësinë në Kosovë”, ka thënë me këtë rast kryetarja e Alternativës, Mimoza Kusari Lila. Lavdi dëshmorëve të kombit, lavdi dëshmorëve të Vraniqit!
Presidenti Ibrahim Rugova, themeluesi shpirtëror, dhe arkitekti i shtetit të Kosovës
Kryetarja e Alternativës, znj. Mimoza Kusari-Lila, së bashku me bashkëpunëtorë, Kryetarin e Kuvendit të Republikës së Kosovës, Dimal Basha, Kryetaren e partisë GUXO, Donika Gërvalla, si dhe anëtarë të tjerë të kabinetit qeveritar, bëri homazhe duke vendosur lule të freskëta te varri i Presidentit historik, Ibrahim Rugova, në 20-vjetorin e ndarjes së tij nga jeta. “Sot, me përulje dhe respekt, bëmë homazhe dhe vendosëm lule të freskëta te varri i Presidentit historik, Ibrahim Rugova, në 20-vjetorin e ndarjes së tij nga jeta. Përkujtimi i tij nuk është vetëm një akt nderimi, por një rikujtim i fuqishëm i rrugës që ai i dha popullit dhe shtetit tonë. Presidenti Ibrahim Rugova mbetet një figurë madhore e historisë sonë kombëtare, arkitekt i vizionit për një Kosovë të lirë, të pavarur dhe të ndërtuar mbi paqe, dije dhe dinjitet njerëzor. Në kohët më të errëta për popullin tonë, ai zgjodhi mençurinë mbi dhunën, dialogun mbi hakmarrjen dhe dijenë mbi frikën”, është shprehur ajo. “Si intelektual i rrallë, dhe udhëheqës me vizion të qartë, Rugova e kuptoi se arsimi ishte arma më e fuqishme e qëndresës sonë kombëtare. Ndërtimi i sistemit paralel arsimor u bë një akt heroik i mbijetesës dhe dinjitetit, i mbajtur gjallë nga sakrifica e jashtëzakonshme e mësimdhënësve dhe prindërve, që besuan në të ardhmen edhe kur gjithçka dukej e pamundur.Presidenti Rugova e ngriti zërin e Kosovës në skenën ndërkombëtare, duke e bërë të njohur padrejtësinë, dhunën dhe terrorin e ushtruar ndaj një populli të pafajshëm. Ai i dha Kosovës një identitet politik dhe moral, duke e vendosur çështjen tonë në zemrën e diplomacisë botërore”, ka theksuar Kusari Lila. Lavdi e përjetshme jetës, veprës dhe vizionit të Presidentit tonë, Ibrahim Rugova.
17 janari është plagë dhe krenari
Kryetarja e Alternativës, deputetja Mimoza Kusari-Lila, së bashku me bashkëpunëtorë dhe të prirë nga Kryeministri Albin Kurti, kanë qëndruar sot në Dubovik të Deçanit, ku kanë kujtuar Jusuf e Bardhosh Gërvallën si dhe Kadri Zekën në përvjetorin e vrasjes së tyre. Me këtë rast, ata kanë bërë homazhe dhe kanë vendosur buqeta me lule pranë varreve duke nderuar jetën dhe sakrificën e tyre. “Në këtë ditë të vitit 1982, u shuan dhunshëm Jusuf e Bardhosh Gërvalla dhe Kadri Zeka patriot e veprimtarë që jetuan e vepruan për një ide më të madhe se frika: lirinë. Ata lanë pas një vepër që nuk u vra dot, mendimin politik, organizimin, fjalën e shkruar dhe guximin për të thënë të vërtetën kur heshtja ishte më e sigurt”, ka theksuar Kusari Lila. Jusuf Gërvalla, përveçse veprimtar i palodhur, ishte edhe krijues i rrallë artistik. Poezia, muzika dhe fjala e tij u bënë formë rezistence, zë i ndërgjegjes kolektive dhe dëshmi se kultura është po aq e fuqishme sa qëndresa. Siç shkruante ai: “Kënga ime është zëri i atdheut të robëruar.” Kjo thënie edhe sot përçon mesazhin e qartë për misionin e tij dhe për forcën e artit si akt lirie. Përcjellja e kësaj historie nuk guxon të mbetet një ritual formal, por përgjegjësi. Trashëgimia e Gërvallëve dhe e Kadri Zekës duhet të jetë pjesë e edukimit të gjeneratave të reja, jo si mit i largët, por si mësim i gjallë. Rruga dhe vepra e tyre na nevojiten si udhërrëfyes për të ardhmen, për të ndërtuar një shoqëri me mendim të lirë, guxim moral dhe dinjitet. Ata u vranë, por nuk u mposhtën. Detyra jonë është t’i mbajmë gjallë, në kujtesë, në arsim dhe në veprim. Lavdi jetës dhe veprës së tyre.
Kusari Lila për Masakrën e Reçakut: Reçaku është pika ku e vërteta nuk mund të relativizohet
Kryetarja e Alternativës, deputetja Mimoza Kusari-Lila ka kujtuar Masakrën e Reçakut, duke theksuar se ka krime që historia nuk guxon t’i harrojë dhe dhimbje që koha nuk i shëron. Ajo u shpreh se këto ngjarje mbeten plagë në ndërgjegjen e njerëzimit dhe dëshmi e patjetërsueshme e të vërtetës. Sipas saj, drejtësia mund të vonojë por nuk duhet të heshtë, ndërsa u bëri thirrje të gjithëve të përulemi me respekt para martirëve, duke u zotuar se kujtesa historike do të jetojë më gjatë se çdo përpjekje për shtrembërimin e saj. Ka dhimbje që koha nuk i shëron. Ka krime që historia nuk guxon t’i harrojë. Ka emra që mbeten plagë në ndërgjegjen e njerëzimit. Sot përkujtojmë përvjetorin e Masakrës së Reçakut, ku u vranë 45 civilë të pafajshëm, vetëm pse ishin shqiptarë, vetëm pse donin të jetonin të lirë në tokën e tyre. Reçaku është pika ku e vërteta nuk mund të relativizohet. Është dëshmi se drejtësia mund të vonojë, por nuk duhet të heshtë. Në këtë përvjetor, përulemi me respekt dhe betohemi: Kujtesa do të jetojë më gjatë se çdo përpjekje për ta shtrembëruar të vërtetën. Lavdi e përjetshme martirëve të Reçakut.
Triumf i demokracisë, fitore e Kosovës
Historia e Republikës së Kosovës u shkrua me dorën e vetë qytetarëve të saj. Koalicioni i Lëvizjes VETËVENDOSJE! u konfirmua jo thjesht si fitues, por si vullnet i një populli. Me 486,994 vota, një mbështetje masive prej 51.11%, u dëshmua se besimi te drejtësia dhe e ardhmja është më e fortë se çdo sfidë. Ky nuk është thjesht një numër, është një amanet për siguri, dinjitet dhe begati për çdo familje në vendin tonë. Faleminderit çdo qytetari që qëndroi i palëkundur. Faleminderit mërgatës sonë që rrahjet e zemrës i ktheu në votë. Faleminderit secilit prej jush që bëtë të mundshme këtë fitore plebishitare në zgjedhjet e 28 dhjetorit! Kandidatja për deputete, kryetare e Alternativës Mimoza Kusari Lila, ka arritur të marrë 99, 359 vota, ndërsa kandidatët e Alternativës në këtë listë Skender Thaçi 9, 945 vota dhe Diana Qarkaxhija 8, 222 vota. Bashkë, me guxim dhe përkushtim, do ta ndërtojmë Kosovën që ëndërruam. Fitorja juaj është përgjegjësia jonë!
Deri sa numërmi i votave vazhdon, rezultati është historik
Ende po vazhdon numërimi i votave, e deri sa po pritet përfundimi i këtij procesi numri i votave që ka marrë koalicioni Lëvizja Vetëvendosje, Partia Guxo, Alternativa dhe PShDK është historik. Alternativa falënderon çdo votuese e votues për besimin e dhënë. Faleminderit nga zemra!
Kryetarja e Alternativës, Kusari Lila ka sqaruar pjesëmarrjen e saj në takimet e CIG-ut
Përmes një reagimi kryetarja e Alternativës, Mimoza Kusari Lila ka treguar se në takimet organizuara nga Center for Inclusive Governance (CIG), të cilat mbështeten nga Ministria e Punëve të Jashtme të Zvicrës që nga viti 2010, merr pjesë rregullisht. Ajo ka shtuar se në këto takime marrin pjesë përfaqësues të gjerë politikë nga Kosova dhe Serbia, si dhe zyrtarë nga vendet e QUINT-it. Të dashur qytetarë, Takimet e organizuara nga CIG (Center for Inclusive Governance), me seli në SHBA dhe të mbështetura nga Ministria e Punëve të Jashtme të Zvicrës, zhvillohen që nga viti 2010. Në to kanë marrë pjesë në vazhdimësi përfaqësues të spektrit të gjerë politik nga Kosova dhe Serbia, si nga pozita ashtu edhe nga opozita, me prani të përfaqësuesve të vendeve të QUINT-it dhe të MPJ-së së Zvicrës. Këto takime nuk janë të fshehta. Aty as nuk negociohet dhe as nuk merren vendime. Për transparencë të plotë, lista e pjesëmarrësve në këto takime që nga fillimi i tyre është publike, së bashku me përfundimet nga secili takim i mbajtur. Pra, agjendat e takimeve, listat e pjesëmarrësve dhe koha e organizimit janë informata që ndahen paraprakisht me institucionet relevante, ndërsa raportet përfundimtare publikohen bashkë me listën e pjesëmarrësve në faqen zyrtare të organizatës: http://cigonline.net/publication/ Qytetarë të nderuar, ju siguroj se në diskutimet ku kemi marrë pjesë unë dhe kolegia ime, Fitore Pacolli, kemi përfaqësuar dhe mbrojtur qëndrimet zyrtare dhe publike të Qeverisë së Republikës së Kosovës. Aludimet dhe pretendimet se në këto takime janë marrë vendime në fshehtësi apo se janë arritur marrëveshje jashtë syve të publikut janë të pavërteta. Duke qenë se këto pretendime paraqiten me një agjendë të qëllimshme njëllosëse, e cila vazhdon edhe në këtë vit të ri, ato përbëjnë dezinformim. Për më tepër, tendenca për të veçuar përfaqësuesit e Lëvizjes VETËVENDOSJE! nga të gjithë pjesëmarrësit e tjerë dëshmon qartë se qëllimi i raportimeve është ndërtimi i një narracioni të rremë, i cili tash e disa vite synohet t’i servohet publikut. Ju falënderoj për besimin e madh që i keni dhënë koalicionit të Lëvizjes VETËVENDOSJE! në zgjedhjet e fundit, si dhe për mbështetjen e vazhdueshme gjatë këtyre pesë viteve. Po ashtu, ju përgëzoj për vigjilencën dhe qartësinë në gjykim, pavarësisht fushatave të egra dezinformuese dhe njëllosëse. Ju uroj një fillimvit të mbarë!











